اللعبة واضحة

ما عندهمش شكون يهبط للكياس و يفك النظام، الي عندهم الكل نقانق و فلامة : تلقاه يسخن على الفايسبوك تقول هذا هو : سنقتلع و نقاوم و نضرب و خرطر و بعد يمشي للبلازا و ما يهبطش للكياس و يروح للدار يسب على الفايسبوك في الشعب الجبان.

مليون و 400 على مقياس رختر اليساري قالو، ما كانوش قادرين يقلبو نظام، ما كانوش قادرين يعملو إلي عملوه 200 من أولاد الكرم و حي الإنطلاقة نهار 12 جانفي

شبعة قننوات، خوافة، فلامة، حوايجهم سينيي و ماهمش متع صدام و فكان، عندهم برشة إمتيازات غير مستعدين للتضحية بيها

إيه شنوة الحل ؟ كيفاه يسترجعو السلطة إمالة؟

يفتعلو حرب بين الطبقات الشعبية، يصادمو السلطة مع أولاد الحوم، مع الناس الي ما تخافش لا من حاكم لا من كرطوش، يصادموهم بالسلفية

يستعملو أسلحة البورجوازية العادية : إعلام و أحزاب و تفليم

هكاكة أولاد الشعب، أولاد الحوم، الزواولة، البطالة، المفقرين، السلفية تتحارب مع البوليس و الجيش (أولاد شعب زواولة زادة) باش يفكو خيار الشعب الإنتخابي و يسلمو في إنهم مصدر السلطة و يجيبوها تحت ساقين فروخ البوماضة الي بش تكسر و تفك و تقاتل من البلازا

الحكاية ما تتعداش لولا بهامة النهضة الي من 23 أكتوبر و هي إتطيح في السروال، ما حاسبت حد، ما بدلت شيء، قتلت م السلفية، ضربت بالرش، إرضاءا لبرجوازية متعفنة في بالها هكاكة يرضاو عليها و يخليوها تحكم، هوما يطمعو فيها و هي تجد عليها، و بعد يدورو عليها و يزيدو يطمعوها و هي تزيد تطمع

اليوم هم الأقرب للوصول : فخار يكسر بعضه، أولاد الشعب يتناحرو و هوما ينبرو و يفلمو م البلازا و الأسموز : أضرب النهضة بالسلفية و توة يرجع الحكم للأعيان و المضخمين و جماعة الفغنسي يعبر خير و نسكرو القوس و ترجعلنا السلطة و ننساو الإنتخابات و نعاقبو الشعب و نربيوه الي عمل علينا ثورة و الي ما صلحش غلطتو كي جاتو الإنتخابات و إنتخب غيرنا

هاذي هي حكاية النمر الي حكاولكم عليها...